Af flóðhestum og broddgöltum - og þó ekki

Það rignir mikið í henni Edinborg á veturna. Einmitt núna er þó uppstytta og minn heittelskaði hlaupinn út í garð með þvottinn í hvelli að notfæra sér þurrkinn. Er á meðan er. Og meira að segja heiðskírt svo að sér í bláan himin. Á rúv.ís segir að snjórinn sé að fjúka burt úr Bláfjöllum og hitastigið undir frostmarki. Úff. Vísast kalt í fjörunni við Gróttu í dag. Hér er þó hitatalan rauð. Sjö stig í plús.

Skæðadrífurnar sem hér fjúka eru gerðar af laufum sem nú liggja yfir öllu eins og hvert annað teppi. Ef maður nennir ekki að raka þeim saman og setja í tunnuna má segja sem svo að það sé betra fyrir broddgeltina að láta þau eiga sig. Þetta sagði mér maður í gær. Hef reyndar aldrei séð neina broddgelti en hins vegar skjótast íkornar hér um allt, og láta manni bregða illilega þegar þeir hendast yfir trefjaplastsþakið yfir borðstofunni.


Við nýttum okkur uppstyttu part úr sunnudeginum og heimsóttum dýragarðinn. Myndasyrpa þaðan hér. Dvergflóðhestarnir voru langmestu krúttin, fannst mér. Vorkenndi ísbirninum dálítið, einn og yfirgefinn í litlu búri. Vísast fæddur í búri líka og þekkir ekki annað, aldrei komið í víðáttur óbyggðanna í Grænlandi.

Sýndi innfæddum í Félagi Skota um norræn fræði myndir frá Grænlandi á laugardaginn og las fyrir þá um skötuhjúin Naaju og Mikjál. Það var gaman.

Við hjónakornin (ekki þessi á myndinni fyrir ofan sko) ætlum að bregða undir okkur betri fætinum um helgina og fara í reisu suður á bóginn, og treysta heimasætunni fyrir þeim yngri til mánudags. Förum þó ekki langt, tveir tímar í lestinni til Jórvíkur, fyrrum höfuðstaðar Danalaga en svo nefndist norður-England á mektardögum danskra víkinga þar fyrir margt löngu. Í Jórvík ætlum við meðal annars að skoða stærstu gotnesku kirkju norðan Alpafjalla, eða svo segir amk á túrhestasíðu borgarinnar. Eftir að hafa safnað mér miðaldakirkjum um árabil í Frans, Bretlandi, Ítalíu og víðar get ég bara ekki verið þekkt fyrir að hafa ekki komið í þá stærstu.

Jórvík mun álíka stór og Reykjavíkin, og státar af víkingamiðstöð sem við ætlum líka að líta á og athuga hvort representasjón Jórvíkurmanna á fortíðinni er módernísk, póstmódernísk, strúktúralísk, femínísk - eða bara jórvísk - úps... hér eru farin að birtast einkenni af oflestri yðar einlægrar á þjóðfræðilegum fræðitextum um framsetningu menningar.

Læt þá staðar numið í bili. Það hefur ekki mikið verið bloggað hér að undanförnu en í vetrarrökkrinu sem hér er skollið á birtir alltaf yfir þegar kveðja birtist í kommentaglugganum. Engin pressa samt ;o)

Í guðs friði.